Frå 1. januar blei første avgangen med hurtigbåt Hareid - Valderøy - Ålesund kl. 04:55 fjerna. I praksis betyr det at mange ikke når dei tidlegast avgangane frå Vigra, inkludert KLM sitt morgonfly. Ordførarane på Søre Sunnmøre har kommet med krav om at denne må tilbake i rute. Dette er vidare støtta av Sunnmøre regionråd, Næringsforeiningane på Søre Sunnmøre og Næringsforeningen Ålesundregionen.
I hurtigbåtsambandet Hareid–Valderøya–Ålesund vart den første avgangen frå Hareid på kvardagar, klokka 04.55, fjerna frå 1. januar 2024. Det gir dei reisande og næringslivet på Søre Sunnmøre store utfordringar med å rekke dei fyrste flyavgangane frå Vigra. Og vi vil på det sterkaste oppmode om at 04.55-avgangen snarast kjem på plass igjen.
Med hurtigbåtavgang klokka 05.45 frå Hareid, er det ikkje mogleg å nå flyavgang frå Ålesund lufthamn til Bergen 06.20. Det vert også svært knapp tid for å nå avgangane til Oslo 06.50, og det vert ikkje tid til å sjekke inn bagasje. Det er heilt uakseptabelt at det i praksis vert gjort umogleg å nå dei første flyavgangane på Ålesund lufthamn med kollektivtransport frå Hareid.
For næringslivet på søre Sunnmøre er det svært viktig å ha gode samband til rett tid mellom Hareid og Ålesund lufthamn, ikkje minst tidleg om morgonen. Dette må til for å nå destinasjonar både nasjonalt og internasjonalt. Vi har fått eintydige tilbakemeldingar frå næringslivet om vanskane dei får både økonomisk og praktisk dersom dei vert avskorne for å bruke den mest effektive måten å nå første fly frå Vigra på.
Tilbakemeldingane frå næringslivet peikar på fleire moment:
Reisande rekk ikkje første fly til Bergen.
Reisande rekk då heller ikkje fly frå Bergen til Aberdeen som er brukt av mange sjøfolk og andre innan offshore.
Fleire vil køyre bil til Vigra. Det gir meir trafikk og unødvendig bruk av kapasitet på taxi.
Ein rekk ikkje første avgang med Widerøe til Bergen klokka 06.20.
Dersom ein tek første hurtigbåt klokka 05.45 og buss til Vigra, rekk ein 06.50-flya til Oslo, men ein rekk ikkje å sjekke inn bagasje. Det er stengt når ein kjem, så skal ein ta dette flyet, må ein enten køyre til Vigra eller reise kvelden før og overnatte.
Det er avgrensa med overnattingskapasitet på Vigra.
For eit reiarlag vil det koste mellom 100 000 og 150 000 kroner å sende eit båtmannskap dagen før for at dei skal kunne ta morgonflya og kome seg ut i verda.
Alle bedrifter vil få auka kostnader med drosje med meir dersom nokon må reise med tidlege flyavgangar.
Når flyet til KLM som går klokka 06.30 kjem tilbake i sommarmånadane, vil ein ikkje kunne ta dette utan å køyre bil eller reise til Vigra kvelden før.
Dette kan føre til færre passasjerar på desse rutene, som igjen kan føre til nedlegging.
Næss – næringsforeiningane på søre Sunnmøre er ei organisering av næringsforeiningar og vekstselskap på Søre Sunnmøre. Næss består av Ørsta næringskontor, Volda næringsforum, Vanylven utvikling, Sande kommune, Herøy næringsforum, Ulstein næringsforum, Vekst i Hareid og Hareid næringsforum. Desse aktørane samarbeider om å styrke næringslivet i regionen og fremme næringslivet sine saker.